நல்லடியார் புராணம் (அறிமுகம்)

கடந்த மூன்று வருடங்களாகத் தமிழ்மணத்தின் வாசகனாகவும் பதிவனாகவும் இருந்த என்னை, இந்த வாரம் நட்சத்திரப் பதிவராகத் தமிழ்மணத்தில் எழுதப் பணித்துள்ளார்கள். தமிழ் இணைய தளங்களில் அள்ளித் தெளிக்கப்பட்ட இஸ்லாம் பற்றிய அவதூறுகளுக்கு எனக்குத் தெரிந்த, நான் மெய்யென நம்பியவைகளை ஆதாரங்களுடன் பதிலாக எழுதிய திருப்தியைவிட அவதூறு பரப்பியவர்களால் இஸ்லாத்தை மேலும் ஆய்வு செய்வதற்கும் இன்னும் நன்கு அறிந்து கொள்வதற்கும் வாய்ப்பைப் பெற்றதில் அதிக மகிழ்ச்சி ஏற்பட்டது!.

தமிழ்மணம் மூலம் ஓரளவு அறியப்பட்டாலும் சத்யமார்க்கம், திண்ணை,தமிழோவியம் ஆகிய தளங்களிலும் எழுதும் வாய்ப்புகள் கிடைத்தன. தஞ்சை முஸ்லிம்களைப் பற்றிக் காழ்ப்புணர்வுடன் மலர்மன்னன் தமிழ் சிஃபியில் தொடராக எழுதியபோது,அதற்கு மறுப்பெழுதி அனுப்பியதைக் காலம் கடந்து பிரசுரிக்க முன்வந்தார்கள்.இவையே இணைய ஊடகங்களுடனான எனது தொடர்பு.

நன்கு பரிச்சயமானவர்களைப் பற்றியே அவதூறாக எழுதத் துணிந்தவர்கள், பலருக்கும் பரிச்சயமில்லாத விசயங்களில் எந்தளவுக்கு வரலாற்றுப் புனைவும், அவதூறும் செய்யத் துணிவர் என்பதை உணர்ந்தே எனது பதிவுகளில் திரித்தல்களையும் புரட்டல்களையும் நானறிந்தவற்றைக் கொண்டு தோலுரித்துக் காட்ட முயன்றதன் விளைவே எனது வலைப்பூ பிரவேசம்.

தமிழில் வலைப்பூக்களின் ஆதிக்கத்திற்குப் பிறகு இணைய தளங்கள் புத்துணர்வு பெற்றுள்ளன. முன்பெல்லாம் இணைய தளங்களில் எழுதப்படுபவை அந்தந்தத் தள உரிமையாளரின் கருத்தைப் பிரதிபலிப்பதாக அல்லது ஒத்திருப்பதாக இருந்தால் மட்டுமே பதிப்புக்கு வரும். தள நிர்வாகி விதிக்கும் கட்டுப்பாடுகளோடு கூடிய சில நெறிமுறைகளுக்கு உட்பட்டு எழுதப்பட்டவை, முழுவதுமோ அல்லது திருத்தப்பட்டோ பதிக்கப்படும். ஆனால், வலைப்பூக்களில் எவரும் தமது கருத்துகளை அப்படியே பதிக்க முடியும் என்னும் சுதந்திரம் இருபுறமும் கூரான கத்திக்கு ஒப்பானது என்பது எனது அனுபவக் கருத்து. எதிர்க் கருத்துகளை எழுதும்போதும் முடிந்தவரை அடுத்தவர் கருத்துச் சுதந்திரத்தை மதித்தே எழுதி வருகிறேன்.

பொதுவான விவாதங்களில் எனது மாறுபட்ட கருத்தைச் சொல்லும்போது நன்கு அனுபவமுள்ள பதிவர்களின் எதிர்ப்பைச் சம்பாதித்துள்ளேன். குறிப்பாக, பாலியல் கல்வி, பொங்கல் பண்டிகை, சவ அடக்கம் பற்றிய பதிவுகளில் இவற்றைக் காணலாம்.

இஸ்லாத்தைப் பற்றிய ஆக்கங்கள் பெரும்பாலும் வானத்துக்கு மேலே அல்லது பூமிக்கு கீழே நடப்பவற்றைப் பற்றியே இருக்கும் என்ற கண்ணோட்டத்திலிருந்து விலகி, இஸ்லாம் என்பது சாந்தியையும் சமாதானத்தையும் போதிக்கும் வாழ்க்கை நெறி என்பதை உணர்த்தும் முகமாகவே பெரும்பாலும் எழுதி இருப்பதாக நம்புகிறேன்.

தமிழ்மணம் நடத்திர வாரப் பதிவுகளில் முழுக்க முழுக்க இஸ்லாம் பற்றி எழுதாமல் பொதுவானவற்றை ஒரு முஸ்லிமின் கண்ணோட்டத்தில் எழுதலாம் என்பது எனது திட்டம்.எனது புரிந்து கொள்ளலைத் தர்க்க ரீதியில் தவறென உணர்த்தினால் பரீசிலித்துத் திருத்திக் கொள்ளத் தயங்க மாட்டேன் என்பதையும் இங்குச் சொல்லியாக வேண்டும்.

எனது சுயதேடல்களைப் பெருக்கிக் கொள்ள எழுதியவை அனேகரின் மனதைக் கவர்ந்திருப்பதை பின்னூட்டங்கள், தனி மடல்கள் மூலம் அறிந்து தொடர்ந்து எழுதச் சொல்லி ஊக்குவித்த பலருக்கும் நான் உறுதியாக நம்பி இருக்கும் கொள்கைகளுக்கு எதிராக வைக்கப்பட்ட மாற்றுக் கருத்துகளுக்கு விளக